من طرف ((الحلم))
بوقت من البطا, وبليل تتراقص شياطينه
بعد شفت الضيا ينزع من ثياب المسا..ثلثين
تحايلت المنام اللي مثل بيتج تمر ينه
وانا اللي من تفارقنا,وانا ما غمضت لي عين
غريبه!!. كل حلم يمرفي رقادي تزورينه
والاغرب كيف احلم الحلم, وارجع واحلمه بعدين؟!
قبل يومين, شفتج بالمنام.. وقمت من حينه
ونمت امس ,ورجع نفس المنام اللي قبل يومين
انا اللي قبل اسافر شلت قلبي من شرايينه
تركته في يدج مثل الامانه, واحفضيها زين
ترى (حفظ الامانه دين).. مجبوره تردينه
اجل ,مافيه احد قد قالج: حفظ الامانه دين؟
مرد المقفي.. بيلفي ويستوفي , وتوفينه
بعد ليله, ثلاثه, اربعه , عشره, شهر, شهرين
إذا انتي منتي بقد الكلام اللي تقولينه
حرام..استئمنج حاجه..ولا جيت اطلبج تنسين
تخونين,وتبين ارضى!.واحديرضى تخونينه
انا لاجيت اخونج مع حبيبه ثانيه,ترضين ؟
من اول ما رجعت من السفر ما شفت لج بينه ؟
وانا اللي كنت احسبج قبل ادوس ارض المطار.. تجين
تكونين انتي اول شخص عيني تحتضن عينه
وكنت اتخيلج من زود فرحة رجعتي..تبكين
واشوف بدمعتج حكيج..واعرفه قبل تحكينه
واجيب احلى من اللي بتحكينه,واتركج تحكين
تقولين: الوطن نور..واقول بنور مضوينه
تقولين لي: غديت احلى, واقول:عيونج الحلوين
كلام نام بشفاهج.. وخفتي لا تصحينه
ذخرتيه الغرام اللي ينام...ويتركج تصحين
تغانمتي غيابي..لين رجحتي موازينه
تعلم من يدج لمس الكفوف,وعلمج تجفين
وليتج لاقيةبه شي.. فيني ما تلا قينه
مهو بغرور.. لكن خابرج مالج امل تلقين
تغافلج بغلا.. والا الحلا مهوب من زينه
تزينه الصور.. بس الصحيح( ابن الحلال) زوين
وانا من بناقص عنه يوم انج تبدينه
نصيبي.. هونصيبي لو يسددها من الصوبين
قنوع بمضهري, والسم ما يذبح ثعابينه
((على قول المثل)):ماني حلو.. لكن ماني شين
إذا اهداج الزهر مره, فانا اهديتج بساتينه
واذا الهاج بفرح ليله,فانا تهت لبكاج سنين
واذا استضعفتج املاكه...وشتتج ملايينه
انا حتى فتات الخبزه اقسمها معج نصين
طموحي, بس اجي واظفر بشي تستحقينه
تدينته,تسلفته,سرقته ,مو مهم منين
كأني من كثر ماارضى بكل اللي تمنينه!!
لو انج تطلبين الله ..يعنيني,بقول:امين
(انا ما العب على الحبلين)..وقت الطيش وسنينه
تبين الحين يوم اني كبرت..(العب على الحبلين؟)
ترى عند البدو باالذات عيب اللي تسوينه
حلاتج لا عشقتيني ..تعشقيني ليوم الدين
غرام نسكن ضلوعه..حشيمه من مجانينه
جفا,يجمع معزتنا..ولا عشق يذل اثنين
كثار اللي تحدوني ,وقالولي: تحبينه
امانه..لا تخليني صغير بعينهم..تكفين
لأني كل ما قالوا: (تخون) ..اقول: مسكييييينه
عليج الله وامانه..علميهم من هو المسكين
انا خايف(ليا طاح الجمل تكثر سكاكينه)
وانا ما عادت ضلوعي تحمل طعنه السكين
مثل ما قالوا:المكتوب واضح من عناوينه
لو ارحل منج للغربة..بسافر من ظلامج وين؟
كفايه..كل حلم يمر برقادي تزورينه
كفايه..من تفارقنا..وانا ما غمضت لي عين
قبل يومين شفتج بالمنام,وقمت من حينه
ونمت أمس ,ورجع نفس المنام اللي قبل يومين
* * * *
للشآعر :حآمد زيد
